بنگلادیش، انجلینا جولی کا روہنگیا مہاجرین کے کیمپ کا دورہ

0
191

ڈھاکہ: ہالی ووڈ کی معروف اداکارہ اور اقوام متحدہ کے کمیشن برائے مہاجرین کی خصوصی مندوب انجلینا جولی نے بنگلادیش میں روہنگیا مہاجرین کے کیمپ کا دورہ کیا۔

تفصیلات کے مطابق اداکارہ نے کوکس بازار میں قائم روہنگیا مہاجرین کے کیمپ کا دورہ کیا اور متاثرین سے ملاقاتیں کیں، اس دوران ان کی موجودہ صورت حال کا بھی جائزہ لیا گیا۔

غیر ملکی خبر رساں ادارے کا کہنا ہے کہ جولی نے میانمار میں جنسی ہوس کا نشانہ بننے والی خواتین سے بھی گفتگو کی، وہ تین روزہ دورے پر بنگلادیش پہنچی ہیں۔

انجلینا جولی ایسے وقت پر اس دورے پر گئی ہیں، جب اقوام متحدہ کی طرف سے مہاجرین کی مدد کے لیے تقریباﹰ ایک بلین ڈالر کی فراہمی کی ایک نئی اپیل کی جانے والی ہے۔

ہالی ووڈ اداکارہ دورہ کے اختتام پر بنگلادیش کی وزیراعظم شیخ حسینہ سمیت وزیرخارجہ سے بھی ملاقات کریں گی اس دوران اقوام متحدہ کے روہنگیاں مسلمانوں کی ہرممکن سپورٹ کو مزید موثر بنانے پر تبادلہ خیال کیا جائے گا۔

خیال رہے کہ گذشتہ سال جون میں انجلینا جولی نے دومیز کیمپ کا دورہ کیا تھا اور شامی پناہ گزینوں سے ملاقات کرتے ہوئے کہا تھا کہ دنیا شام کے مہاجرین کے مسئلے کے حل میں ناکام ثابت ہورہی ہے جس کا خمیازہ متاثرہ خاندانوں بالخصوص عورتوں اور بچوں کو بھگتنا پڑ رہا ہے۔

دومیز نامی یہ کیمپ عراق کے نیم خود مختار کرد علاقے میں واقعہ ہے اور یہاں گزشتہ سات سال میں بے گھر ہونے والے 33 ہزار شامی مہاجرین پناہ گزین ہیں۔ انجیلینا جولی نے دورہ کے موقع پر میڈیا کو بتایا تھا کہ سال 2017 کی نسبت اس سال اقوام متحدہ کے ہائی کمیشن برائے مہاجرین کو ملنے والی فنڈنگ نصف رہ گئی ہے۔

LEAVE A REPLY