وزیرِاعظم عمران خان کل کراچی پیکج کا اعلان کریں گے

0
78

کراچی: وزیرِاعظم عمران خان کل کراچی پیکج کا اعلان کریں گے۔

ذرائع کے مطابق کراچی پیکج میں ٹرانسپورٹز کیلئے نئی ٹرانسپورٹ اسکیم کا بھی اعلان کیا جائے گا۔ ٹرانسپورٹ اسکیم کے توسط سے کراچی کے ٹرانسپورٹر بینکوں کے اشتراک سے نئی بسیں خریدنے کیلئے تعاون حاصل کرسکتے ہیں۔

ذرائع نے مزید بتایا ہے کہ ٹرانسفارمیشن کمیٹی نے کراچی پیکج کو حتمی شکل سے دی ہے۔

کراچی کے دورے کے دوران ایک نئے ماسٹر پلان کا بھی اعلان کیا جائے گا جسکا نام ماسٹر پلان 2047 رکھا گیا ہے۔

یاد رہے کہ وزیرِاعظم عمران خان اپنے دورے کے اگلے مرحلے میں کراچی پہنچے۔

ذرائع کے مطابق وزیرِ اعظم عمران خان آج رات گورنر ہاؤس میں قیام کریں گے اور پارٹی رہنماؤں سے ملاقاتیں کریں گے جسکے بعد وہ اندرونِ سندھ کے دورے پر روانہ ہوں گے اور گھوٹکی میں تحریکِ انصاف کے رہنما علی گوہر مہر کی طرف سے دیئے گئے ظہرانے میں بھی شرکت کریں گے۔

 وزیرِاعظم عمران خان نے آج  گوادر انٹرنیشنل ایئرپورٹ کا سنگِ بنیاد رکھا۔

تفصیلات کے مطابق وزیراعظم عمران خان  آج کوئٹہ سے گوادر پہنچے جہاں  انہوں نے ایکسپو کی  تقریب میں شرکت کے بعد نیو انٹرنیشنل گوادر ایئرپورٹ کا سنگِ بنیاد رکھا۔

 اس موقع پر تقریب سے خطاب کرتے ہوئے وزیراعظم نے کہا کہ بلوچستان سے گیس نکلی لیکن فائدہ دوسرے صوبوں کو پہنچا۔ تحریکِ انصاف کی حکومت گوادر کو نیشنل گرڈ سے منسلک کرے گی۔

عمران خان نے گوادر میں سمندر کے پانی کو پینے کے قابل بنانے، گندگی صاف کرنے کیلئے پلانٹس لگانے کے علاوہ گوادر میں دس لاکھ پودے اُگانے اور گوادر سے کراچی تک مسافر اور مال بردار فیری سروس شروع کرنے کا بھی اعلان کیا۔

واضح رہے کہ آج وزیرِاعظم عمران خان کوئٹہ پہنچے تو ملٹری ایوی ایشن بیس پر چیف آف آرمی اسٹاف جنرل قمر جاوید باجوہ نے اُن کا استقبال کیا جسکے بعد وزیراعظم نے آرمی چیف کے ہمراہ بلوچستان ہیلتھ کمپلیکس کا افتتاح کیا۔

آئی ایس پی آر کے مطابق ہیلتھ کمپلیکس کا افتتاح پاکستان آرمی اور بلوچستان حکومت کی مشترکہ کاوش ہے۔ وزیراعظم عمران خان نے کارڈیک انسٹیٹیوٹ کے قیام پر آرمی چیف سے اظہارتشکر کیا اور پاک فوج کے ساتھ مل کر کینسر اسپتال بنانے کا بھی اعلان کیا۔ وزیراعظم نے کہا کہ کوئٹہ سے ایران کے شہر تفتان تک ریلوے ٹریک بچھانے کیلئے ماسٹر پلان پر کام کیا جارہا ہے۔

LEAVE A REPLY